آپریشن وعدہ صادق 4 کی 98 ویں لہر، امریکی و اسرائیلی تنصیبات پر ایران کے مزید حملے

ایرانی پاسدارانِ انقلاب نے اعلان کیا ہے کہ آپریشن وعدہ صادق 4 کی 98ویں لہر کے تحت امریکی اور اسرائیلی کمانڈ، آپریشنل، لاجسٹک اور صنعتی و عسکری تنصیبات کو نشانہ بنایا گیا۔

بیان کے مطابق پیرکوہونے والی کارروائیوں کو  شہید میجر جنرل مجید خادمی کے نام  کیا گیا۔

پاسدارانِ انقلاب کے مطابق آپریشن کے پہلے مرحلے میں بحریہ کے اہلکاروں نے صہیونی رجیم سے منسلک کنٹینر جہازکو کروز میزائل سے نشانہ بنایاجس سے جہازمیں آگ بھڑک اٹھی۔

بیان میں کہا گیا کہ تل ابیب کے شمالی و جنوبی علاقوں، حیفا کے اسٹریٹجک مراکز، بئر السبع میں کیمیائی کمپنیوں اور فیکٹریوں، اور پتاح تکفا میں اسرائیلی فوجی اہلکاروں کی موجودگی کے مقامات کو ایرانی بیلسٹک میزائلوں سے نشانہ بنایا گیا، جبکہ دعویٰ کیا گیا کہ اسرائیلی فضائی دفاع ان میزائلوں کو روکنے میں ناکام رہا۔

بیان کے مطابق ایک اور مرحلے میں متحدہ عرب امارات اور اسرائیل کے مشترکہ ڈرون پروڈکشن مرکز اور علی السالم بیس پر موجود متعدد فضائی اثاثوں کو میزائل اور ڈرون حملوں سے نشانہ بنایا گیا۔

پاسدارانِ انقلاب نے کہا کہ ایرانی مسلح افواج اور خطے میں مزاحمتی گروہوں کی جانب سے دشمن کے خلاف کارروائیاں جاری ہیں ۔ آبنائے ہرمز میں آمد و رفت اور خلیج فارس میں سرگرمیوں پر پاسدارانِ انقلاب کی بحریہ مسلسل نظر رکھے ہوئے ہے۔