حملہ ہوا تو امریکی اڈے ہدف ہوں گے: ایران نے امریکا کو خبردار کر دیا

ایران نے امریکی صدر ڈونلڈ ٹرمپ کو خبردار کیا ہے کہ اگر کسی بھی امریکی جارحیت کی کوشش کی گئی تو ایران بھرپور جواب دے گا۔

ایرانی پارلیمنٹ کے اسپیکر محمد باقر قالیباف نے کہا ہے کہ حملے کی صورت میں ایران اسرائیل اور خطے میں موجود امریکی اڈوں کو جائز ہدف سمجھے گا۔

اس موقع پر اسرائیلی وزیراعظم اور امریکی وزیر خارجہ نے ایران میں ممکنہ امریکی مداخلت کے حوالے سے ٹیلی فون پر تبادلہ خیال کیا۔ خبر ایجنسی کے مطابق ممکنہ حملے کے پیشِ نظر اسرائیل ہائی الرٹ پر ہے۔

واضح رہے کہ امریکی صدر ڈونلڈ ٹرمپ نے سوشل میڈیا پر اپنے پیغام میں کہا تھا کہ امریکا ایرانی مظاہرین کی مدد کے لیے تیار ہے، تاہم اس کا مطلب ایران میں فوج اتارنا نہیں ہے۔ انہوں نے کہا کہ ایران میں صورت حال پر نظر رکھی جا رہی ہے اور بعض شہروں پر عوام قابض ہیں، جبکہ ایرانی حکومت نے برسوں عوام کے ساتھ بُرا سلوک کیا اور آج انہیں اپنے کیے کی سزا مل رہی ہے۔