ایران جنگ نے تیل کی عالمی مارکیٹ میں نیا بحران پیدا کر دیا: امریکی میڈیا

ایران میں جاری جنگی تنازع اور خطے کی صورتحال نے تیل کی عالمی مارکیٹ اور بحری ترسیل کے نظام میں ایک نیا اور شدید بحران پیدا کر دیا ہے، جس کے باعث خام تیل لے جانے والے سپر ٹینکرز (VLCCs) کی شدید قلت ہو گئی ہے। امریکی اخبار ‘وال اسٹریٹ جرنل’ کی رپورٹ کے مطابق، ڈرون حملوں کے بعد سعودی عرب کی اہم ‘ایسٹ ویسٹ پائپ لائن’ کی عارضی بندش کی وجہ سے خام تیل کی ایک بڑی مقدار کو دوبارہ نجی شٹل سروسز کے ذریعے آبنائے ہرمز کی طرف منتقل کرنا پڑا۔ اس تبدیلی نے پہلے سے دباؤ کا شکار آئل ٹینکرز پر مزید بوجھ ڈال دیا ہے۔

رپورٹ کے مطابق، اس بحران کے اثرات اب عالمی سطح پر پھیل چکے ہیں۔ آبنائے ہرمز کے ارد گرد طویل سفر اور بحری جہازوں کے شٹل سروسز میں مصروف ہونے کی وجہ سے آئل ٹینکرز کے یومیہ کرائے تاریخ کی ریکارڈ ترین سطح پر پہنچ گئے ہیں۔ خلیج فارس کے اندر سے تیل لوڈ کر کے آبنائے ہرمز کے ذریعے ترسیل کرنے والے سپر ٹینکر کا یومیہ کرایہ 10 لاکھ ڈالر سے تجاوز کر گیا ہے، جو کہ فی بیرل 26 ڈالر یا خام تیل کی کل مالیت کا ایک چوتھائی بنتا ہے۔ اس وقت عالمی سطح پر سپر ٹینکرز کی اوسط یومیہ کمائی 6 لاکھ 51 ہزار ڈالر سے زائد ہو چکی ہے۔ دوسری جانب حوثی حملوں کے خطرے کے پیشِ نظر بحری جہازوں نے باب المندب کا راستہ چھوڑ کر افریقہ میں ‘کیپ آف گڈ ہوپ’ کے طویل راستے سے سفر شروع کر دیا ہے، جس سے فی جہاز 10 لاکھ ڈالر کا اضافی خرچ آ رہا ہے۔