ایران نے بھارتی شہریوں کے لیے ویزا فری انٹری بند کرنے کا اعلان کردیا

ایران نے بھارتی شہریوں کے لیے ون وے ویزا فری انٹری بند کرنے کا فیصلہ کیا ہے، جس کا اطلاق 22 نومبر سے ہوگا۔

بھارتی میڈیا کے مطابق یہ فیصلہ ایسے متعدد واقعات کے بعد کیا گیا ہے جن میں بھارتی شہریوں کو ملازمت کے جھوٹے وعدوں یا دوسرے ممالک تک لے جانے کے بہانے ایران بلایا گیا اور وہاں پہنچنے پر کئی افراد کو اغوا کر کے تاوان کا مطالبہ کیا گیا۔

بھارتی وزارت خارجہ نے کہا کہ ایرانی حکومت نے عام بھارتی پاسپورٹ رکھنے والے مسافروں کے لیے دستیاب ویزا فری سہولت معطل کر دی ہے تاکہ جرائم پیشہ عناصر کی جانب سے اس سہولت کے غلط استعمال کو روکا جا سکے۔

اب 22 نومبر سے تمام عام بھارتی پاسپورٹ ہولڈرز کو ایران میں داخلے یا وہاں سے تیسرے ملک جانے کے لیے پہلے سے ویزا حاصل کرنا ہوگا۔