امریکا کے ساتھ معاہدے پر اتوار کو دستخط نہیں ہوں گے، ایران

ایرانی وزارت خارجہ کے ترجمان اسماعیل بقائی نے واضح کیا ہے کہ امریکا اور ایران کے درمیان مفاہمتی یادداشت پر دستخط کل نہیں کیے جائیں گے۔

انہوں نے کہا کہ یہ معاہدہ اتوار کے روز طے شدہ شیڈول کے مطابق آگے نہیں بڑھ رہا، جبکہ اس حوالے سے جنگ کے خاتمے پر توجہ مرکوز کرنے والے اسلام آباد میمورنڈم پر عمل جاری ہے۔

ترجمان کے مطابق اس مرحلے پر یہ فیصلہ کیا گیا ہے کہ جوہری معاملے پر فی الحال کوئی بات چیت نہیں ہوگی اور معاہدے پر دستخط کے لیے مناسب وقت کا انتظار کیا جا رہا ہے، تاہم یہ واضح ہے کہ یہ عمل کل مکمل نہیں ہوگا۔

اسماعیل بقائی نے مزید کہا کہ آنے والے دنوں میں مفاہمتی یادداشت پر دستخط کے امکانات کو مکمل طور پر رد نہیں کیا جا سکتا، لیکن صورتحال مسلسل بدل رہی ہے۔

انہوں نے یہ بھی کہا کہ دوسرے فریق کے غیر مستحکم رویے کے باعث اس معاملے پر کسی بھی حتمی بیان سے احتیاط برتنی چاہیے۔