توانائی تنصیبات پر امریکی اور اسرائیلی حملے: ایران کا اقوام متحدہ کو خط

ایران نے اقوام متحدہ کے سیکرٹری جنرل، سلامتی کونسل اور جنرل اسمبلی کے صدر کو خط ارسال کرتے ہوئے امریکہ اور اسرائیل پر توانائی کی تنصیبات کو نشانہ بنانے کا الزام عائد کر دیا۔

اقوام متحدہ میں اسلامی جمہوریہ ایران کے سفیر اور مستقل نمائندے امیر سعید ایروانی نے اپنے خط میں مؤقف اختیار کیا کہ امریکہ اور اسرائیل کی جانب سے کیے گئے حملے ایران کی خودمختاری اور علاقائی سالمیت کی کھلی خلاف ورزی ہیں۔

خط میں کہا گیا ہے کہ ان حملوں کے نتیجے میں شہریوں کی ہلاکتیں ہوئیں جبکہ ملک بھر میں شہری بنیادی ڈھانچے کو بڑے پیمانے پر نقصان پہنچا، جس کی مکمل بین الاقوامی ذمہ داری امریکہ اور اسرائیل پر عائد ہوتی ہے۔

ایرانی سفیر نے بتایا کہ 18 مارچ 2026 کی صبح جنوبی ایران میں گیس کی شہری تنصیبات، خصوصاً جنوبی پارس گیس فیلڈ اور اسلویہ کے علاقے کو نشانہ بنایا گیا۔

ابتدائی اطلاعات کے مطابق حملوں کے نتیجے میں جنوبی پارس گیس فیلڈ کے متعدد فیز عارضی طور پر بند ہو گئے ہیں جبکہ نقصانات کا تخمینہ لگایا جا رہا ہے۔

خط میں مزید کہا گیا کہ یہ تنصیبات توانائی کی فراہمی، معاشی استحکام اور لاکھوں شہریوں کی فلاح کے لیے نہایت اہم ہیں، جنہیں نشانہ بنانا بین الاقوامی قوانین کی سنگین خلاف ورزی ہے۔

ایران نے عالمی برادری سے مطالبہ کیا ہے کہ اس معاملے کا فوری نوٹس لیا جائے کیونکہ یہ صورتحال عالمی امن و سلامتی کے لیے خطرہ بن سکتی ہے۔