ایران کا خارگ جزیرے پر یو اے ای سے حملے کا الزام ، متحدہ عرب امارات نے تردید کر دی

ایران نے خارگ جزیرے پر ہونے والے امریکی حملوں کے بعد دعویٰ کیا ہے کہ یہ کارروائی متحدہ عرب امارات کی سرزمین سے کی گئی، تاہم امارات نے اس الزام کو مسترد کر دیا ہے۔

ایرانی فوجی ترجمان نے بیان میں متحدہ عرب امارات میں موجود شہریوں کو خبردار کرتے ہوئے کہا کہ وہ ممکنہ ہدف بننے والے علاقوں، بندرگاہوں، گودیوں اور امریکی پناہ گاہوں سے دور رہیں۔

ترجمان کے مطابق ایران کو انہی علاقوں سے نشانہ بنایا گیا ہے اور اگر جوابی کارروائی کی گئی تو امارات میں موجود انہی امریکی اہداف کو نشانہ بنایا جائے گا۔

یاد رہے کہ گزشتہ روز امریکا نے ایران کے خارگ جزیرے میں واقع نوے فوجی تنصیبات پر حملے کیے تھے۔

ایرانی حکام کا کہنا ہے کہ ان حملوں میں اتنی تباہی نہیں ہوئی جتنی بتائی جا رہی ہے، تاہم ایران نے خبردار کیا ہے کہ آئندہ زیادہ خطرناک اور تباہ کن ہتھیار استعمال کیے جا سکتے ہیں۔

دوسری جانب متحدہ عرب امارات نے واضح کیا ہے کہ ایرانی جزیرے پر ہونے والے حملے میں اماراتی سرزمین استعمال نہیں ہوئی۔

اماراتی سفارتی مشیر کے مطابق ایران کا الزام بے بنیاد ہے اور اس کی پالیسی غیر منطقی ہے۔

دریں اثنا ایران نے گزشتہ روز متحدہ عرب امارات کی فجیرہ بندرگاہ پر بغیر پائلٹ طیاروں کے ذریعے حملہ کیا۔

امریکی ذرائع ابلاغ کے مطابق حملے کے بعد فجیرہ بندرگاہ پر تیل لادنے کے بعض آپریشن معطل ہو گئے اور متاثرہ مقام پر شدید آگ لگ گئی جبکہ علاقے میں دھواں پھیل گیا۔

اماراتی حکام کا کہنا ہے کہ فضائی دفاعی نظام نے نو بیلسٹک میزائل اور تینتیس بغیر پائلٹ طیاروں کو تباہ کر دیا۔