جزیرہ قشم پر امریکی حملے کے بعد ایران کا بحرین میں امریکی فوجی اڈے پر حملہ

ایران کے پاسدارانِ انقلاب نے بحرین میں قائم الجفیر فوجی اڈے پر امریکی فوج کو نشانہ بنانے کی کارروائی کا اعلان کیا ہے۔ ایرانی میڈیا کے مطابق یہ حملہ ایران کے جزیرہ قشم میں پانی صاف کرنے والے پلانٹ پر امریکی فوج کی کارروائی کے جواب میں کیا گیا۔

اطلاعات کے مطابق امریکی حملے کے نتیجے میں پانی صاف کرنے والا پلانٹ متاثر ہوا جس سے قشم اور اس کے اطراف کے کم از کم تیس دیہات میں پانی کی فراہمی متاثر ہوئی ہے۔

ایران کے وزیر خارجہ عباس عراقچی نے امریکی کارروائی کو سخت الفاظ میں مسترد کرتے ہوئے کہا کہ شہری سہولت کے منصوبے کو نشانہ بنانا ناقابل قبول اقدام ہے۔

ان کا کہنا تھا کہ ایران کے بنیادی ڈھانچے پر حملہ خطے میں کشیدگی کو مزید بڑھا سکتا ہے اور اس کے سنگین نتائج سامنے آسکتے ہیں۔ عباس عراقچی نے کہا کہ اس طرح کے اقدامات کی مثال امریکا نے قائم کی ہے، ایران نے نہیں۔