پاسداران انقلاب نے 3 بحری جہازوں کو وارننگ دیکر آبنائے ہرمز سے واپس بھیج دیا

تہران/واشنگٹن: عالمی تجارت کے لیے انتہائی اہم سمندری گزرگاہ، آبنائے ہرمز میں کشیدگی ایک بار پھر بڑھ گئی ہے۔ ایرانی پاسدارانِ انقلاب (IRGC) نے کارروائی کرتے ہوئے 3 بحری جہازوں کو وارننگ جاری کی اور انہیں واپس مڑنے پر مجبور کر دیا۔ ایرانی حکام کی جانب سے یقین دہانیوں کے باوجود، دو چینی بحری جہاز بھی اس صورتحال کے باعث واپس لوٹ گئے۔

پاسدارانِ انقلاب کے ترجمان کا کہنا ہے کہ آبنائے ہرمز امریکہ، اسرائیل اور ان کے حامیوں کے لیے مکمل طور پر بند رہے گی اور دشمن کی بندرگاہوں سے آنے یا جانے والے کسی بھی جہاز کو یہاں سے گزرنے کی اجازت نہیں دی جائے گی۔ یہ بیان امریکی صدر کے اس دعوے کے برعکس سامنے آیا ہے جس میں انہوں نے کہا تھا کہ ایران نے خیر سگالی کے طور پر 10 آئل ٹینکرز کو گزرنے کی اجازت دی ہے۔

امریکی میڈیا کی رپورٹس کے مطابق، ایران اب تک آبنائے ہرمز میں کم و بیش 19 بحری جہازوں کو نشانہ بنا چکا ہے، جس کے باعث عالمی شپنگ کمپنیوں نے خوف کے مارے یہ راستہ استعمال کرنا بند کر دیا ہے۔ اس وقت خلیج میں تقریباً 2000 بحری جہاز پھنسے ہوئے ہیں، جس سے عالمی سپلائی چین اور تیل کی ترسیل بری طرح متاثر ہونے کا خدشہ پیدا ہو گیا ہے۔