غیر معقول امریکی مطالبات قبول نہیں، ضرورت پڑی تو بھرپور جواب دیا جائے گا: ایرانی وزارت خارجہ

ایرانی وزارت خارجہ کے ترجمان اسماعیل بقائی نے پریس بریفنگ کے دوران غیر معقول امریکی مطالبات کو مسترد کرتے ہوئے کہا ہے کہ اگر ایران پر جنگ مسلط کی گئی تو بھرپور جواب دیا جائے گا، تاہم سفارت کاری کا راستہ کھلا رکھا گیا ہے۔ انہوں نے تصدیق کی کہ ایران نے امریکی صدر کی تجویز پر اپنا متوازن جواب پاکستان کے ذریعے بھجوا دیا ہے اور ثالثی کے لیے پاکستان کے پیشہ ورانہ کردار کی تعریف کی ہے۔ اسماعیل بقائی نے واضح کیا کہ ایران نے جنگ کے خاتمے، پابندیوں کی منسوخی، منجمد اثاثوں کی بحالی اور آبنائے ہرمز کو دوبارہ کھولنے کے لیے منصفانہ پیشکش کی ہے۔ انہوں نے یورپی ممالک کو آبنائے ہرمز میں مداخلت سے باز رہنے کی تنبیہ کرتے ہوئے کہا کہ ایسی کسی بھی مہم جوئی سے عالمی سطح پر توانائی کی قیمتوں میں اضافہ اور سلامتی کے سنگین مسائل پیدا ہوں گے۔