ایران میں مظاہرین پر تشدد بند کیا جائے، برطانیہ، فرانس اور جرمنی کا مشترکہ مطالبہ

برطانیہ، فرانس اور جرمنی نے ایران میں مظاہرین کی ہلاکتوں اور سکیورٹی فورسز کے تشدد کی شدید الفاظ میں مذمت کرتے ہوئے ایرانی حکام سے مظاہرین کے خلاف طاقت کے استعمال سے باز رہنے کا مطالبہ کیا ہے۔

ایران میں جاری کشیدہ صورتحال پر فرانسیسی صدر، برطانوی وزیراعظم اور جرمن چانسلر نے ایک مشترکہ بیان جاری کیا، جس میں ایرانی سکیورٹی فورسز کے تشدد پر گہری تشویش کا اظہار کیا گیا۔ بیان میں زور دیا گیا کہ ایرانی سکیورٹی فورسز مظاہرین کے خلاف تشدد سے گریز کریں۔

مشترکہ بیان میں کہا گیا کہ ایرانی حکام پر یہ ذمہ داری عائد ہوتی ہے کہ وہ اپنی آبادی کا تحفظ کریں اور آزادیٔ اظہار اور پُرامن اجتماع کے حق کو یقینی بنائیں، تاکہ عوام کسی بھی قسم کی انتقامی کارروائی کے خوف کے بغیر اپنے بنیادی حقوق استعمال کر سکیں۔

دوسری جانب گزشتہ روز امریکی صدر نے بھی ایک انٹرویو کے دوران خبردار کیا تھا کہ اگر احتجاج کے دوران مظاہرین کو قتل کیا گیا تو ایران کو بھرپور اور سخت جواب دیا جائے گا۔

یاد رہے کہ ایران میں حکومت مخالف مظاہرے بدستور جاری ہیں۔ غیر ملکی انسانی حقوق کے اداروں کے مطابق احتجاج 100 سے زائد شہروں میں پھیل چکا ہے۔ مظاہروں کے دوران اب تک 47 افراد ہلاک ہو چکے ہیں، جن میں متعدد سکیورٹی اہلکار بھی شامل ہیں، جبکہ تقریباً 2500 افراد کو گرفتار کیا جا چکا ہے۔