ایرانی وزیر خارجہ نے مظاہروں میں جدید آتشی اسلحہ استعمال کرنے کی ویڈیو جاری کردی

ایرانی وزیر خارجہ عباس عراقچی نے ایران میں احتجاج کے دوران تخریب کاریوں پر ایک ویڈیو کلپ جاری کیا ہے، جس میں مظاہرین کے جدید آتشی اسلحہ کے استعمال اور عوامی و سرکاری ٹرانسپورٹ کو نقصان پہنچانے کے مناظر دکھائے گئے ہیں۔

ویڈیو کلپ میں شرپسند عناصر کو مہارت سے پیٹرول بم استعمال کرتے اور آگ لگاتے دیکھا جا سکتا ہے۔ عباس عراقچی نے کہا کہ ایران میں پولیس اہلکار حقیقی دہشت گردوں کو ہلاک کر رہے ہیں، اور ان دہشت گردوں کی نگرانی ایسے عناصر کر رہے ہیں جنہیں مائیک پومپیو نے موساد کے ایجنٹ قرار دیا ہے۔

ایرانی وزیر خارجہ نے امریکی واقعہ کی جانب اشارہ کرتے ہوئے کہا کہ چند روز قبل امریکہ میں ایک نہتی، بے گناہ نوجوان خاتون کو امریکی امیگریشن ایجنٹ نے قتل کیا، جبکہ امریکی انتظامیہ نے اسے داخلی دہشت گرد قرار دیا۔

عراقچی نے سوال اٹھایا کہ کیا ایران میں احتجاج واقعی آزادی کے لیے کیا جا رہا ہے اور کیا امریکی انتظامیہ اپنے ہی ملک میں اس طرح کے مناظر برداشت کرے گی؟