ایران میں حکومت مخالف مظاہرے 100 شہروں تک پھیل گئے، 47 ہلاکتیں

ایران میں حکومت مخالف مظاہروں نے شدت اختیار کر لی ہے اور یہ احتجاج 100 سے زائد شہروں تک پھیل گیا ہے۔ انسانی حقوق کے غیر ملکی اداروں کے مطابق مظاہروں کے دوران اب تک 47 افراد ہلاک اور تقریباً 2500 گرفتار ہو چکے ہیں، جن میں سکیورٹی اہلکار بھی شامل ہیں۔

مظاہرین کی بڑی تعداد تہران اور مشہد میں رات گئے حکومت کے خلاف مارچ کر رہی تھی۔ شدید کشیدگی کے پیش نظر ایران میں ایک بار پھر انٹرنیٹ سروس معطل کر دی گئی جبکہ ترکیے نے استنبول سے تہران جانے والی تمام پروازیں منسوخ کر دی ہیں۔ کرمانشاہ میں مظاہروں کے دوران نقاب پوش افراد کی فائرنگ کی ویڈیو بھی سامنے آئی ہے۔

سپریم لیڈر آیت اللہ علی خامنہ ای نے کہا کہ احتجاج جائز ہے مگر فساد ناقابل قبول ہے۔ حکومت مظاہرین سے بات چیت کرے گی، لیکن تخریب کاروں سے کوئی رعایت نہیں برتی جائے گی۔

دوسری جانب ایران نے اقوام متحدہ سے اپنی ریاستی خودمختاری کے تحفظ اور بیرونی مداخلت روکنے کا مطالبہ کیا ہے اور امریکی بیانات کو مداخلت اور دھوکا دہی قرار دیا ہے۔