فوجی حکمت عملی تبدیل، امریکی جارحیت کا جواب زیادہ وسیع ہوگا: ایرانی فوج

ایرانی فوج کے ترجمان محمد اکرمینیا نے تصدیق کی ہے کہ ایران کی فوجی حکمتِ عملی دفاعی انداز سے جارحانہ طرزِ عمل میں تبدیل ہو چکی ہے۔ ایرانی خبر رساں ادارے ’ارنا‘ کو دیے گئے انٹرویو میں انہوں نے بتایا کہ حالیہ جنگ کے دوران پیشگی کارروائیوں اور تیز رفتار ردِعمل کے ذریعے اس نئی پالیسی کا مظاہرہ کیا گیا۔ انہوں نے اردن میں امریکی اڈے کو پیشگی کارروائی کے تحت نشانہ بنانے کا بھی ذکر کیا، اور واضح کیا کہ کسی بھی قسم کی جارحیت کا جواب اب پہلے سے کہیں زیادہ شدید اور وسیع پیمانے پر دیا جائے گا۔

دوسری جانب، ایرانی وزارتِ دفاع کے ترجمان بریگیڈیئر جنرل رضا طلائی نیک نے دعویٰ کیا ہے کہ گزشتہ ایک سال میں ملک میں دفاعی ہتھیاروں اور عسکری سازوسامان کی پیداوار دگنی ہو چکی ہے۔ جنگ کے دوران بعض دفاعی تنصیبات پر حملوں کے باوجود مقامی سطح پر ہتھیاروں اور گولہ بارود کی فراہمی مسلسل جاری رہی، جبکہ کچھ اہم دفاعی مصنوعات کی پیداوار میں تین گنا اضافہ دیکھا گیا۔ انہوں نے مزید بتایا کہ 1979 کے انقلاب کے وقت ایران محض 31 بنیادی عسکری مصنوعات تیار کرتا تھا، جبکہ آج یہ تعداد ایک ہزار سے زائد جدید عسکری و دفاعی نظاموں تک پہنچ چکی ہے۔