جنگ میں اب تک 800 امریکی فوجی اور 1321 اسرائیلی فوجی مارے گئے: ایران

تہران: ایرانی فوج کے ترجمان نے جنگ کے آغاز سے اب تک امریکہ اور اسرائیل کو پہنچنے والے نقصانات کے حوالے سے سنگین اعداد و شمار جاری کر دیے ہیں۔ ترجمان کے مطابق، جاری معرکے میں اب تک 800 امریکی فوجی ہلاک اور 5 ہزار زخمی ہو چکے ہیں، جبکہ 1321 اسرائیلی فوجی بھی مارے گئے ہیں۔ ایرانی فوج کا دعویٰ ہے کہ انہوں نے اب تک خطے میں 17 امریکی فوجی اڈے مکمل طور پر تباہ کر دیے ہیں۔

ترجمان ایرانی فوج نے امریکی فوج کی حکمتِ عملی پر کڑی تنقید کرتے ہوئے کہا کہ امریکی فوجیوں کا ہوٹلوں میں چھپنا ان کی ‘ذلت آمیز پسپائی’ اور عالمی ساکھ کو پہنچنے والا بڑا دھچکا ہے۔ انہوں نے واضح کیا کہ ایران اپنے مطالبات پورے ہونے تک امریکہ کو خطے سے آسانی سے جانے نہیں دے گا۔ ترجمان نے یہ بھی دعویٰ کیا کہ ایران نے ثابت کر دیا ہے کہ جدید ترین امریکی ایف-35 (F-35) جنگی طیارے اب محفوظ نہیں رہے اور ان کا دفاعی حصار توڑ دیا گیا ہے۔

خلیجی ریاستوں کو مخاطب کرتے ہوئے ایرانی فوجی ترجمان نے مشورہ دیا کہ وہ امریکی افواج کو اپنے اڈوں سے نکال باہر کریں، بصورتِ دیگر ان اڈوں کو مزید نشانہ بنایا جائے گا۔ انہوں نے مزید کہا کہ عالمی تجارتی گزرگاہ آبنائے ہرمز (Strait of Hormuz) کی صورتحال اب پہلے جیسی نہیں رہے گی اور ایران ان ہوٹلوں کو بھی امریکی فوجی ہدف سمجھے گا جہاں مفرور امریکی فوجی پناہ لیے ہوئے ہیں۔