ایران نے لمبی جنگ کی تیاری مکمل کررکھی ہے : علی لاریجانی

سیکرٹری جنرل ایرانی نیشنل سیکیورٹی کونسل علی لاریجانی نے کہا ہے کہ ایران نے لمبی جنگ کے لیے مکمل تیاری کر رکھی ہے اور ہم اپنی چھ ہزار سالہ تہذیب کے دفاع کے لیے ہر ممکن اقدام کریں گے۔

علی لاریجانی نے زور دے کر کہا کہ قیمت کچھ بھی ہو، دشمن کو اندازے لگانے کی غلطی پر ضرور پچھتانا پڑے گا۔ ان کا کہنا تھا کہ 300 سال کی طرح اس بار بھی جنگ میں پہل ایران کی طرف سے نہیں کی گئی۔

دوسری جانب ایران کی عبوری لیڈر شپ کونسل کے رکن آیت اللّٰہ علی رضا عرافی نے کہا ہے کہ ایران پر امریکی اور اسرائیلی حملہ غلط فہمی اور غیر درست تخمینوں کا نتیجہ ہے۔ اپنے پہلے بیان میں انہوں نے واضح کیا کہ امریکا اور اسرائیل نے ایران کے خلاف غیر مناسب اور غیر منصفانہ اقدامات کیے۔

آیت اللّٰہ علی رضا عرافی نے مزید کہا کہ قیادت کونسل مستعدی اور مکمل تیاری کے ساتھ اپنے فرائض انجام دے گی۔