ایران کی امریکا اور علاقائی اتحادیوں کو سخت جوابی کارروائی کی دھمکی

ایران کی خاتم الانبیاء مشترکہ فوجی کمانڈ نے امریکہ اور اس کے علاقائی اتحادیوں کو شدید خبردار کرتے ہوئے کہا ہے کہ ایران کی سرحدوں یا مفادات کے خلاف کسی بھی قسم کی جارحیت کا انتہائی سخت، جامع اور فیصلہ کن جواب دیا جائے گا۔ ایرانی فوجی کمانڈ کی جانب سے جاری کردہ بیان میں واضح کیا گیا ہے کہ اگر امریکہ نے کوئی غلط قدم اٹھایا تو خطے میں قائم تمام امریکی فوجی اڈے اور اس کے معاشی و اسٹریٹجک مفادات ایرانی افواج کے مستقیم نشانے پر ہوں گے، جبکہ اس عمل میں امریکہ کا ساتھ دینے والے علاقائی ممالک کو بھی ایرانی کارروائی کا سامنا کرنا پڑے گا۔

ترجمان ایرانی فوجی کمانڈ نے زور دے کر کہا کہ امریکی اڈوں اور اس کے اتحادیوں کے مفادات کو نشانہ بنانے میں کسی قسم کی رعایت یا نرمی نہیں برتی جائے گی۔ بیان میں دعویٰ کیا گیا ہے کہ دستیاب اطلاعات اور فوجی جائزوں کے مطابق امریکہ نے یورپ کے ایک ملک میں ہونے والے حالیہ مشترکہ اجلاس کے دوران ایران کے خلاف دوبارہ فوجی کارروائی کے مختلف آپشنز پر تفصیلی غور کیا ہے۔ فوجی کمانڈ کا کہنا تھا کہ ایران کے خلاف جاری تمام تر کشیدگی اور جنگ کی فضا صیہونیوں کی جھوٹی ڈرامہ سازی اور پروپیگنڈے کی بنیاد پر قائم کی گئی ہے۔

دوسری جانب ایران کی سپریم نیشنل سیکیورٹی کونسل کے سیکرٹری محسن رضائی نے بھی امریکہ کی جانب سے دوبارہ جارحیت کے قوی خدشات کا اظہار کیا ہے۔ انہوں نے بتایا کہ حالیہ ملٹری اسیسمنٹ اور دفاعی جائزوں سے یہ بات واضح ہوتی ہے کہ امریکہ کی جانب سے ایک اور مہم جوئی یا جارحانہ اقدام کے امکانات بہت زیادہ ہیں۔ انہوں نے واضح کیا کہ ایرانی مسلح افواج کسی بھی ممکنہ صورتِ حال سے نمٹنے اور دشمن کو منہ توڑ جواب دینے کے لیے مکمل الرٹ ہیں۔