ایران کا حملوں کی 80 ویں لہر کا آغاز، تل ابیب پر میزائلوں کی بارش، 12 اسرائیلی زخمی

تہران/تل ابیب: ایران اور اسرائیل کے درمیان جاری تنازع نے اس وقت انتہائی خطرناک رخ اختیار کر لیا ہے جب ایران نے اسرائیل اور خطے میں موجود امریکی فوجی اڈوں کے خلاف حملوں کی 80 ویں لہر کا آغاز کر دیا۔ ایرانی پاسدارانِ انقلاب (IRGC) کے مطابق، اس تازہ کارروائی میں خیبر شکن، عماد اور سجیل میزائلوں سمیت تباہ کن ڈرونز کا استعمال کیا گیا، جس کے نتیجے میں تل ابیب اور بنی براک میں متعدد عمارتیں ملبے کا ڈھیر بن گئیں اور 12 اسرائیلی شہری زخمی ہوئے ہیں۔

پاسدارانِ انقلاب کا دعویٰ ہے کہ انہوں نے مقبوضہ علاقوں میں صیہونی انٹیلی جنس ایجنسیوں، لاجسٹک مراکز اور فوجی تنصیبات کو کامیابی سے نشانہ بنایا ہے۔ رپورٹ کے مطابق، اسرائیل کا دفاعی نظام ‘آئرن ڈوم’ ان میزائلوں کو روکنے میں ناکام رہا۔ اسرائیل کے علاوہ کویت، اردن اور بحرین میں قائم امریکی فوجی اڈوں پر بھی میزائل داغے گئے ہیں۔ بحرین کے ایک جزیرے پر واقع فوجی اڈے پر حملے میں ایک اماراتی فوجی کنٹریکٹر (مراکشی شہری) جاں بحق جبکہ درجن سے زائد اہلکار زخمی ہوئے ہیں۔

دوسری جانب، کویت ایئرپورٹ پر ڈرون حملے سے ایندھن کے ٹینک میں آگ بھڑک اٹھی، تاہم کسی جانی نقصان کی اطلاع نہیں ملی۔ ایران نے اصفہان پر امریکی و اسرائیلی بمباری کی ویڈیوز بھی جاری کی ہیں، جس میں مارکیٹوں اور ریستورانوں کی تباہی دکھائی گئی ہے۔ ایرانی میڈیا کا کہنا ہے کہ امریکہ اور اسرائیل سویلین آبادی کو نشانہ بنا کر اسے نیوکلیئر پروگرام کے خلاف کارروائی قرار دے رہے ہیں۔ اسرائیلی پولیس نے تل ابیب میں صحافیوں کو کوریج سے روک دیا ہے، جسے ایران نے اپنی بڑی عسکری کامیابی اور اسرائیل کی بدحواسی قرار دیا ہے۔