ایران نے عربوں کو واپس اونٹوں کے دور میں پہنچانے کی دھمکی دے دی

ایران کے خاتم الانبیاء ہیڈکوارٹرز کے ترجمان بریگیڈیئر جنرل ابراہیم ذوالفقاری نے امریکا کو سخت ترین الفاظ میں وارننگ دیتے ہوئے کہا ہے کہ اگر امریکی حملوں میں ایرانی انفرااسٹرکچر کو نشانہ بنایا گیا تو اس کے نتائج پورے خطے کے لیے انتہائی تباہ کن ہوں گے۔ انہوں نے دوٹوک الفاظ میں تنبیہ کی کہ اگر امریکا نے اپنی کارروائیاں جاری رکھیں تو ایران جواب میں خطے کے انفرااسٹرکچر کا ایک ایک ٹکڑا اس طرح نیست و نابود کر دے گا جیسے کبھی اس کا کوئی وجود ہی نہ تھا، جبکہ عرب ممالک کو دوبارہ اونٹوں کے پرانے دور میں واپس دھکیل دیا جائے گا۔

ترجمان خاتم الانبیاء ہیڈکوارٹرز بریگیڈیئر جنرل ابراہیم ذوالفقاری نے مزید خبردار کیا کہ امریکی جارحیت کے نتیجے میں یہ تنازع مزید پھیل سکتا ہے اور پورا خطہ اس کی لپیٹ میں آ جائے گا۔ ایرانی فوجی کمانڈر کی جانب سے جاری ہونے والے اس انتہائی سخت اور دھمکی آمیز بیان پر امریکی حکام کی طرف سے تاحال کوئی باضابطہ موقف یا ردِعمل سامنے نہیں آیا ہے۔