علاقائی ممالک اپنی سرزمین امریکا یا اسرائیل کو فراہم نہ کریں، معاونت دشمنی تصور ہوگی: ایران

تہران: ایران کی وزارتِ خارجہ نے خطے کے تمام ممالک کو سخت ترین الفاظ میں خبردار کیا ہے کہ وہ اپنی سرزمیں یا فضائی حدود کو ایران کے خلاف امریکی یا اسرائیلی فوجی کارروائیوں کے لیے ہرگز استعمال نہ ہونے دیں، اور واضح کیا ہے کہ اس قسم کی کسی بھی معاونت کو تہران کے خلاف براہِ راست دشمنی تصور کیا جائے گا۔ سماجی رابطے کی ویب سائٹ ایکس (ٹویٹر) پر جاری کردہ بیانات میں ایرانی وزارتِ خارجہ نے امریکی فوجی اقدامات کی شدید مذمت کرتے ہوئے انہیں اقوامِ متحدہ کے چارٹر کی کھلی خلاف ورزی قرار دیا۔ ایران کا کہنا ہے کہ حالیہ ہیلی کاپٹر حادثے کو ڈھال بنا کر ایران پر حملوں کا بہانہ تراشا گیا، جس کے جواب میں ایرانی مسلح افواج نے اپنے دفاع کا جائز حق استعمال کرتے ہوئے خطے میں قائم امریکی فوجی اڈوں کو نشانہ بنایا۔ وزارتِ خارجہ نے زور دیا کہ ملک کی بقا اور سلامتی کے تحفظ کے لیے کسی بھی خطرے کو کچلنے سے گریز نہیں کیا جائے گا اور اقوامِ متحدہ کو چاہیے کہ وہ امریکہ کو ان جارحانہ حملوں پر جوابدہ ٹھہرائے۔

دوسری جانب، ایران کے وزیر خارجہ عباس عراقچی نے بھی سماجی رابطے کی ویب سائٹ پر سخت موقف اختیار کرتے ہوئے امریکہ کو حتمی وارننگ جاری کی ہے۔ انہوں نے کہا کہ اگر امریکہ اپنے فوجیوں کا تحفظ اور بقا چاہتا ہے تو اسے فی الفور ہمارے خطے سے نکل جانا چاہیے۔ عباس عراقچی کا کہنا تھا کہ میدانِ جنگ میں پے در پے ناکامیوں اور شکستوں کے باوجود واشنگٹن نے ایران کی قوتِ ارادی اور قومی عزم کو آزمانے کی فاش غلطی کی ہے۔ انہوں نے واضح کیا کہ ایران کی طاقتور اور الرٹ مسلح افواج کسی بھی حملے یا دھمکی کا جواب دیے بغیر نہیں رہیں گی اور موجودہ صورتحال میں کسی بھی ممکنہ مہم جوئی کا بھرپور، دندان شکن اور فوری جواب دیا جائے گا۔