سعودی عرب کی آرامکو آئل ریفائنری پر اسرائیل نے حملہ کیا: ایرانی میڈیا

تسنیم نیوز کے مطابق ایرانی عسکری ذرائع نے دعویٰ کیا ہے کہ سعودی عرب میں تیل کی تنصیبات پر حملہ اسرائیل کی جانب سے مبینہ ’فالس فلیگ‘ کارروائی کا حصہ تھا۔
رپورٹ کے مطابق ان حملوں کا مقصد خطے کے ممالک کو گمراہ کرنا اور ایران میں شہری مقامات پر ہونے والے اسرائیلی حملوں سے توجہ ہٹانا ہے۔
ایرانی میڈیا کے مطابق ذرائع کا کہنا ہے کہ ایران پہلے ہی واضح کر چکا ہے کہ وہ خطے میں امریکی اور اسرائیلی مفادات، تنصیبات اور سہولیات کو نشانہ بنائے گا، تاہم آرامکو آئل ریفائنری ان اہداف میں شامل نہیں تھی۔
ایرانی ذرائع نے مزید دعویٰ کیا کہ انٹیلی جنس معلومات کے مطابق اسرائیل کے آئندہ ممکنہ فالس فلیگ حملوں میں الفجیرہ بندرگاہ بھی شامل ہو سکتی ہے، جہاں حملے کی منصوبہ بندی کی جا رہی ہے۔
دوسری جانب سعودی سرکاری ٹیلی ویژن کے مطابق ریفائنری کو ڈرون حملے کے بعد عارضی طور پر بند کر دیا گیا تھا۔ سعودی وزارت دفاع کا کہنا ہے کہ حملہ کرنے والے دونوں ڈرونز کو فضا میں ہی تباہ کر دیا گیا، تاہم ان کا ملبہ گرنے سے تیل کی تنصیب میں آگ بھڑک اٹھی۔