امریکا کے ایران کے جنوبی علاقوں پر نئے فضائی حملے، تہران کی سخت ردعمل کی دھمکی

ایرانی میڈیا کے مطابق امریکہ نے ایک بار پھر ایران کے سٹریٹجک اہمیت کے حامل جنوبی علاقوں پر فضائی حملے کیے ہیں، جن کے دوران جزیرہ قشم کے قریب امریکی پراجیکٹائلز (میزائل یا گولے) کو مار گرایا گیا ہے۔ رپورٹس میں بتایا گیا ہے کہ قشم، کیش اور ابو موسیٰ کے جزائر امریکی فضائی کارروائیوں کا نشانہ بنے ہیں، تاہم ان حملوں کے نتیجے میں ہونے والے جانی یا مالی نقصان کی تفصیلات فوری طور پر سامنے نہیں آسکی ہیں۔ ایرانی وزارتِ خارجہ نے امریکہ پر الزام عائد کیا ہے کہ واشنگٹن نے تہران کے خلاف اپنی عسکری مہم تیز کر دی ہے اور مفاہمتی یادداشت کی کھلی خلاف ورزی کرتے ہوئے ایران کی بحری ناکہ بندی بھی کر رکھی ہے۔

امریکی حملوں کے جواب میں ایرانی عسکری قیادت ‘خاتم الانبیاء ہیڈکوارٹرز’ کے ترجمان نے انتہائی سخت ردِعمل جاری کرتے ہوئے خبردار کیا ہے کہ اگر امریکہ نے ایرانی انفراسٹرکچر کو نشانہ بنانے کی جرات کی تو ایران پورے خطے کے انفراسٹرکچر کو نیست و نابود کر دے گا۔ ترجمان نے سخت لہجہ اختیار کرتے ہوئے دھمکی دی کہ “ہم خطے کے انفراسٹرکچر کا ایک ایک ٹکڑا ایسے تباہ کریں گے جیسے کبھی اس کا وجود ہی نہ تھا، اور عربوں کو اونٹوں اور سینڈل کے پرانے دور میں واپس دھکیل دیں گے۔” دوسری جانب، امریکی حکام نے تاحال ان ایرانی دعوؤں اور دھمکی آمیز بیانات پر کوئی باضابطہ موقف اختیار نہیں کیا ہے۔