ایرانی حملوں سے پاکستان کو سعودی عرب کے معاملے میں مشکل صورتحال کا سامنا

عرب ٹی وی چینل الجزیرہ نے اپنی رپورٹ میں لکھا ہے کہ ایران کی جانب سے سعودی عرب اور دیگر خلیجی ممالک پر بڑھتے ہوئے حملے پاکستان کے لیے مشکل صورت حال پیدا کر رہے ہیں۔

رپورٹ کے مطابق ایران اور سعودی عرب کے درمیان کشیدگی کے بڑھتے دباؤ کے باعث پاکستان کے لیے غیر جانبدار رہنا آسان نہیں ہوگا۔ اسلام آباد اب تک دونوں ملکوں کے درمیان کشیدگی میں کمی کی کوشش کر رہا ہے اور ایران کی قیادت کو یہ پیغام بھی دے رہا ہے کہ پاکستان اور سعودی عرب کے دفاعی معاہدے کا خیال رکھا جائے۔

تجزیہ کاروں کا کہنا ہے کہ فی الحال پاکستان کا سب سے مضبوط ہتھیار سفارت کاری ہے، لیکن اگر سعودی توانائی اور بنیادی ڈھانچے پر حملے بڑھتے ہیں تو سعودی عرب پاکستان سے دفاعی تعاون کا مطالبہ کر سکتا ہے۔ اگر پاکستان اپنے وعدے پورے نہ کرے تو پاک–سعودی تعلقات کو ناقابلِ تلافی نقصان پہنچ سکتا ہے۔