ایران سے مذاکرات میں اہم پیشرفت ہوئی، دیرپا امن کی راہ ہموار ہوگی: محسن نقوی

وفاقی وزیرِ داخلہ محسن نقوی نے دورۂ ایران کو انتہائی کامیاب قرار دیتے ہوئے کہا ہے کہ ان کی اور فیلڈ مارشل عاصم منیر کی ایرانی صدر مسعود پزشکیان کے ساتھ ملاقات انتہائی مثبت اور نتیجہ خیز رہی ہے۔ سوشل میڈیا پلیٹ فارم ایکس (X) پر جاری اپنے بیان میں محسن نقوی نے بتایا کہ گفتگو کا بنیادی محور ایران اور امریکہ کے درمیان جاری تنازع، مشرقِ وسطیٰ میں کشیدگی اور آئندہ کا لائحہ عمل تھا۔ ان کا کہنا تھا کہ ملاقات کے دوران اسلام آباد مفاہمتی یادداشت (ایم او یو) کی بحالی اور درکار اقدامات پر تفصیلی تبادلہ خیال کیا گیا، جبکہ ایرانی صدر نے اپنی حکومت کا موقف اور خدشات کھل کر سامنے رکھے۔ وفاقی وزیر نے امید ظاہر کی کہ اس ملاقات میں ہونے والی پیش رفت مستقبل میں خطے کے دیرپا امن کے لیے راہ ہموار کرے گی۔