پی ٹی آئی کی تمام تجاویز تسلیم کرنے کے باوجود بات آگے نہ بڑھ سکی: وزیر داخلہ

وفاقی وزیرِ داخلہ محسن نقوی نے سینیٹ اجلاس میں اظہارِ خیال کرتے ہوئے انکشاف کیا ہے کہ حکومت نے پاکستان تحریکِ انصاف (پی ٹی آئی) کے تمام 6 تحفظات اور تجاویز کو تسلیم کر لیا تھا، تاہم اس کے باوجود مذاکراتی عمل آگے نہ بڑھ سکا۔

سینیٹ اجلاس کے دوران خطاب کرتے ہوئے وزیرِ داخلہ محسن نقوی کا کہنا تھا کہ وفاقی حکومت سیاسی معاملات کو بات چیت کے ذریعے ہی حل کرنے کی خواش مند تھی۔ مذاکرات کے عمل کے دوران سیاسی اور قومی سلامتی، بالخصوص دہشت گردی کا معاملہ سرفہرست تھا۔ انہوں نے بتایا کہ ڈرافٹ کی تیاری میں 3 مرتبہ تبدیلیاں کی گئیں اور چوتھی بار پی ٹی آئی کی جانب سے 6 مزید تجاویز سامنے رکھی گئیں، جنہیں حکومت نے من وعن قبول کر لیا، لیکن تمام تر لچک کے باوجود بات آگے نہ بڑھ سکی۔

مجلسِ وحدتِ مسلمین کے سربراہ علامہ راجہ ناصر عباس کے آئینی خلاف ورزی سے متعلق تحفظات اور اعتراضات کا جواب دیتے ہوئے محسن نقوی نے واضح کیا کہ خیبر پختونخوا میں آئین کی کوئی خلاف ورزی نہیں ہوئی۔ حکومت نے آئینِ پاکستان کے تحت ہی صوبے میں ایمرجنسی اور گورنر راج کا نفاذ کیا ہے اور تمام اقدامات آئین و قانون کے دائرے میں رہتے ہوئے اٹھائے گئے ہیں۔