بندرگاہوں میں اصلاحات تیز کرنے کی ہدایت، وزیراعظم کا کارگو ڈویل ٹائم کم کرنے پر زور

وزیراعظم محمد شہباز شریف کی زیر صدارت معاشی ترقی کے لیے بندرگاہوں سے متعلق نجی شعبے کے ورکنگ گروپ کا اجلاس ہوا، جس میں کاروباری برادری کی سہولت کے لیے بندرگاہوں پر اصلاحات اور سہولیات سے متعلق سفارشات پیش کی گئیں۔ وزیراعظم نے کہا کہ ملک میں کاروبار اور معاشی ترقی کے لیے بندرگاہوں کا کردار انتہائی اہم ہے۔

وزیراعظم نے ہدایت دی کہ مختلف اداروں کے درمیان تعاون بہتر بنایا جائے، پورٹ چارجز کم کیے جائیں، متروکہ کارگو کی شفاف نیلامی کے لیے مؤثر نظام لایا جائے اور بندرگاہوں پر ابتدائی ٹیسٹنگ لیب قائم کی جائیں۔ انہوں نے بندرگاہوں کی ڈریجنگ، توسیع اور ریل کنیکٹیویٹی بہتر بنانے پر بھی زور دیا۔

اجلاس میں بریفنگ دی گئی کہ نیشنل پورٹس ماسٹر پلان پر تیزی سے کام جاری ہے، پورٹ کمیونٹی سسٹم فعال ہو چکا ہے اور متروکہ کارگو کی نیلامی کے لیے جلد ای-بڈنگ نظام متعارف کرایا جائے گا۔ وزیراعظم نے ورکنگ گروپ کی تجاویز کو سراہتے ہوئے کہا کہ ان اقدامات سے کاروباری برادری کا اعتماد مزید بڑھے گا۔