انسٹاگرام پر صارفین کے لیے حیران کن ’ریڈ اونلی موڈ‘ کی آزمائش

میٹا کی زیرِ ملکیت معروف فوٹو و ویڈیو شیئرنگ ایپ انسٹاگرام نے ایک منفرد اور حیران کن فیچر ’ریڈ اونلی موڈ‘ (Read-Only Mode) کی آزمائش شروع کر دی ہے۔ اس نئے فیچر کا بنیادی مقصد صارفین کو بغیر کسی ڈیجیٹل فٹ پرنٹ (Digital Footprint) کے پلیٹ فارم کو براؤز کرنے کی سہولت فراہم کرنا ہے۔ رپورٹس کے مطابق، جب یہ موڈ فعال ہوگا تو صارف انسٹاگرام کی فیڈز اور پیجز دیکھ تو سکیں گے، تاہم وہ لائیک، کمنٹ، ڈی ایم (Direct Message)، اکاؤنٹس کو فالو کرنے اور اسٹوریز کا جواب دینے جیسے بنیادی فیچرز استعمال نہیں کر پائیں گے۔

انٹرنیٹ براؤزرز کے ’انکوگنیٹو موڈ‘ سے مشابہ اس فیچر کی مدد سے صارفین اپنی پرائیویسی برقرار رکھتے ہوئے ایپ استعمال کر سکتے ہیں۔ تکنیکی رپورٹس میں یہ دعویٰ بھی کیا جا رہا ہے کہ میٹا اس فیچر کو ممکنہ طور پر اپنی ماہانہ سبسکرپشن سروس ’انسٹاگرام پلس‘ (Instagram Plus) کے ساتھ منسلک کر کے صرف پیڈ صارفین کے لیے پیش کر سکتا ہے۔ فی الحال یہ فیچر آزمائشی مراحل میں ہے اور اسے تمام عام صارفین کے لیے جلد دستیاب کیے جانے کی توقع ہے۔