انسٹاگرام کی دوستی شادی میں تبدیل، اطالوی لڑکی پاکستان پہنچ گئی

انسٹاگرام پر شروع ہونے والی دوستی بالآخر ایک انوکھی محبت کی کہانی کے بعد شادی کے بندھن میں بندھ گئی، اور اطالوی دلہن اپنے پیار کی خاطر ہزاروں میل کا سفر طے کر کے پاکستان پہنچ گئی۔

چھ سال قبل سوشل میڈیا پلیٹ فارم انسٹاگرام پر ہونے والی یہ دوستی وقت کے ساتھ ساتھ گہری محبت میں تبدیل ہو گئی۔ جب اطالوی دلہن لاہور ایئرپورٹ پہنچی تو دولہا نبیل اعوان اور ان کے اہل خانہ نے اس کا انتہائی پرتپاک اور شاندار استقبال کیا۔ دونوں خاندانوں کی رضامندی اور تمام قانونی و شرعی تقاضے پورے کرنے کے بعد باقاعدہ شادی کی تقریب منعقد کی گئی، جبکہ اس کے بعد کلرکہار کے ایک مقامی ہوٹل میں شاندار دعوتِ ولیمہ کا بھی خصوصی اہتمام کیا گیا جس میں دولہا کے اہل خانہ، قریبی رشتہ داروں اور دوستوں نے بھرپور شرکت کی۔

دولہا کے اہل خانہ کے مطابق، دولہا اور دلہن دونوں قوتِ سماعت سے محروم ہیں، لیکن ایک دوسرے کا ساتھ ملنے پر وہ دونوں بے حد خوش اور مطمئن ہیں۔ اطالوی دلہن نے اس خاص موقع پر خوبصورت پاکستانی لباس زیب تن کیا اور مقامی ثقافت سے مانوس ہوتے ہوئے وہاں کے لوگوں کے ساتھ بہت جلد گھل مل گئی