انصاف لائرز فورم خیبرپختونخوا کے صدر قاضی انور ایڈووکیٹ کا استعفیٰ،پی ٹی آئی سے بھی علیحدگی

انصاف لائرز فورم (آئی ایل ایف) خیبرپختونخوا کے صوبائی صدر قاضی انور ایڈووکیٹ نے اپنے عہدے سے استعفیٰ دے دیا ہے۔ انہوں نے اس کے ساتھ پاکستان تحریکِ انصاف (پی ٹی آئی) اور پارٹی سے منسلک تمام تنظیمی اور مشاورتی عہدوں سے بھی علیحدگی اختیار کر لی ہے۔

ذرائع کے مطابق قاضی انور ایڈووکیٹ کے استعفے کی بنیادی وجہ حالیہ خیبرپختونخوا بار کونسل کے انتخابات بنے، جہاں پی ٹی آئی کے پانچ منتخب ممبران موجود تھے۔ انہی پانچ ووٹوں کی بنیاد پر ایک پروفیشنل گروپ اور جماعتِ اسلامی کے امیدوار کو کامیابی دلائی گئی، تاہم اس تمام صورتحال میں انصاف لائرز فورم کے صوبائی صدر قاضی انور ایڈووکیٹ کو نظر انداز کیا گیا اور انہیں ووٹ نہیں دیا گیا۔قانونی حلقوں کا کہنا ہے کہ یہ معاملہ محض انتخابی حکمتِ عملی تک محدود نہیں بلکہ پارٹی کے اندر موجود گروپ بندیوں اور ترجیحی سیاست کی واضح عکاسی کرتا ہے، جس سے پارٹی سے وابستہ کئی سینئر وکلا میں بھی تشویش پائی جاتی ہے۔قاضی انور ایڈووکیٹ نے اپنے ویڈیو بیان میں کھل کر ناراضی کا اظہار کرتے ہوئے کہا کہ وہ پاکستان تحریکِ انصاف اور انصاف لائرز فورم کے تمام عہدوں سے استعفیٰ دے رہے ہیں۔ ان کا کہنا تھا کہ انہوں نے اپنی استطاعت کے مطابق پارٹی کی خدمت کی، مگر حالیہ فیصلوں نے انہیں شدید مایوس کیا ہے۔ان کے استعفے کے بعد قانونی اور سیاسی حلقوں میں چہ مگوئیاں جاری ہیں، جبکہ پی ٹی آئی اور انصاف لائرز فورم کی قیادت کی جانب سے تاحال اس معاملے پر کوئی باضابطہ ردعمل سامنے نہیں آیا۔