سڈنی حملے سے جوڑنے پر بے گناہ پاکستانی نوجوان منظرِ عام پر آگیا، ویڈیو پیغام جاری

سڈنی: آسٹریلیا کے ساحل بونڈی میں ہونے والے حملے کے بعد پھیلنے والے پروپیگنڈے پر سڈنی میں مقیم پاکستانی نوجوان نوید اکرم منظرِ عام پر آگئے اور سوشل میڈیا پر ویڈیو پیغام جاری کر دیا۔

نوید اکرم کا تعلق پاکستان کے شہر لاہور سے ہے، جنہیں بھارتی، افغان اور اسرائیلی میڈیا کے بعض چینلز اور سوشل میڈیا اکاؤنٹس نے بونڈی حملے میں گرفتار ملزم سے جوڑ دیا تھا۔ ان پلیٹ فارمز پر حملہ آور کی جگہ نوید اکرم کی ذاتی تصاویر نشر کی گئیں، جو ان کے مطابق فیس بک اکاؤنٹ سے بغیر اجازت لی گئیں۔

ویڈیو پیغام میں نوید اکرم نے بونڈی حملے کی شدید مذمت کرتے ہوئے واضح کیا کہ ان کا اس واقعے سے کوئی تعلق نہیں اور نہ ہی انہیں کسی مقدمے میں گرفتار کیا گیا ہے۔ انہوں نے کہا کہ حملے میں گرفتار شخص کا نام بھی نوید اکرم بتایا جا رہا ہے، جس کے باعث غلط فہمی پیدا ہوئی اور ان کی تصاویر غلط طور پر استعمال کی گئیں۔

نوید اکرم کا کہنا تھا کہ اس غیر ذمہ دارانہ عمل کی وجہ سے ان کی جان کو خطرات لاحق ہو گئے ہیں۔ انہوں نے میڈیا اداروں اور سوشل میڈیا صارفین سے مطالبہ کیا کہ کسی بھی تصویر یا خبر کو چلانے سے قبل مکمل تصدیق کی جائے۔