دریائے سندھ کا پانی پینے کے قابل نہیں رہا: محکمہ آبپاشی نے خطرے کی گھنٹی بجا دی

ایگزیکٹیو انجینئر کوٹری بیراج نے شدید تشویش کا اظہار کرتے ہوئے انتباہ جاری کیا ہے کہ دریائے سندھ کا پانی اس وقت زہریلا اور پینے کے بالکل ناقابل ہو چکا ہے۔ محکمہ آبپاشی کے مطابق منچھر جھیل کا آلودہ پانی اور مٹیاری شوگر ملز کا کیمیکل ملا فاضل پانی دریائے سندھ میں شامل ہو رہا ہے، جس کے باعث پانی کا معیار انتہائی خطرناک حد تک گر گیا ہے۔ اس صورتحال پر سپرنٹنڈنٹ انجینئر کلری بگھاڑ ڈویژن کو تحریری طور پر آگاہ کر دیا گیا ہے۔

جامعہ مہران کی واٹر کوالٹی کنٹرول لیب کی رپورٹ کے مطابق پانی میں ٹی ڈی ایس (TDS) کی شرح 30 ستمبر کو 660 تھی جو یکم اکتوبر کو بڑھ کر 940 تک پہنچ گئی ہے، جبکہ عالمی ادارہ صحت (WHO) کے مطابق پینے کے پانی کی آخری حد 1,000 ملی گرام فی لیٹر ہے۔ محکمہ آبپاشی نے خبردار کیا ہے کہ اس زہریلے پانی کے استعمال سے گردے فیل ہونے، ہیپاٹائٹس، جلدی اور پیٹ کے شدید امراض پھیلنے کا خدشہ ہے۔ چونکہ کوٹری بیراج سے حیدرآباد، جامشورو اور کراچی جیسے بڑے شہروں کو پانی فراہم کیا جاتا ہے، اس لیے محکمہ آبپاشی نے فوری طور پر دریائے سندھ میں تازہ پانی چھوڑنے اور واٹر سیوریج اتھارٹی سمیت تمام لوکل گورنمنٹ اداروں کو فی الوقت پانی کی سپلائی معطل کرنے کی ہدایت کی ہے۔