بھارتی اخبار دی ہندو نے 2025 کو بھارت کی عالمی سطح پر سفارتی سبکی کا سال قرار دیدیا

بھارتی جریدے دی ہندو نے 2025 کو بھارت کی عالمی سطح پر سفارتی سبکی کا سال قرار دیا اور کہا کہ نریندر مودی سے وابستہ توقعات حقیقت میں تبدیل نہ ہو سکیں۔ جریدے کے مطابق علامتی سفارت کاری، ذاتی تعلقات اور بیانیہ سازی بھارت کی معاشی، عسکری اور سفارتی طاقت کا نعم البدل ثابت نہ ہو سکی۔

دی ہندو نے لکھا کہ بھارت نے امریکا، روس اور چین کے ساتھ وعدے کیے جن پر عمل کرنے کی صلاحیت نہیں رکھتا تھا، اور امریکا کے ساتھ تعلقات میں 2025 بھارت کے لیے مشکل ترین سال رہا۔ اخبار نے پہلگام اور سندور آپریشنز کو بھی ناکامی قرار دیا، اور کہا کہ سعودی-پاکستان دفاعی معاہدہ بھارت کے لیے ایک دھچکا تھا۔

جریدے نے مزید کہا کہ بھارت اور بنگلہ دیش کے تعلقات اب تک کی سب سے کشیدہ سطح پر ہیں، اور بھارت کا دوسروں کو مورد الزام ٹھہرانا اصلاح اور حقیقت پسندانہ پالیسی سازی میں سب سے بڑی رکاوٹ ہے۔
ماہرین کے مطابق دی ہندو کی رپورٹ پاکستان کے مؤقف کی تصدیق کرتی ہے کہ بھارت کی خارجہ پالیسی زیادہ تر بیانیہ پر مبنی ہے، عملی نتائج پر نہیں، اور بھارت اب امریکا کے لیے ناگزیر اسٹریٹجک شراکت دار نہیں رہا۔