سپیکر قومی اسمبلی سردار ایاز صادق سے بھارتی وزیر خارجہ کی ملاقات، مصافحہ بھی کیا

سپیکر قومی اسمبلی سردار ایاز صادق سے بھارتی وزیر خارجہ جے شنکر نے ملاقات کی اور مصافحہ بھی کیا، جسے سیاسی حلقوں میں ایک غیر معمولی اور حیران کن پیشرفت قرار دیا جا رہا ہے۔

ذرائع کے مطابق یہ ملاقات ڈھاکا میں اس وقت ہوئی جب دونوں رہنما بنگلادیش کی سابق وزیراعظم خالدہ ضیاء کے جنازے میں شرکت کے لیے موجود تھے۔ ملاقات کے دوران بھارتی وزیر خارجہ جے شنکر خود چل کر سپیکر قومی اسمبلی سردار ایاز صادق کے پاس آئے اور دونوں رہنماؤں کے درمیان خوشگوار جملوں کا تبادلہ بھی ہوا۔

یہ ملاقات مئی 2025 میں ہونے والی پاک بھارت جنگ کے بعد دونوں ممالک کے اعلیٰ حکام کے درمیان پہلی غیر رسمی ملاقات سمجھی جا رہی ہے۔ واضح رہے کہ جنگ کے بعد پاکستان اور بھارت کے تعلقات شدید کشیدگی کا شکار ہیں اور دونوں ممالک کے درمیان سیاسی اور سفارتی روابط تقریباً معطل ہیں۔

یاد رہے کہ پاک بھارت کشیدگی کے بعد بھارت نے اپنی کرکٹ ٹیم کے کھلاڑیوں کو پاکستانی کھلاڑیوں سے مصافحہ کرنے سے روک دیا تھا، تاہم دیگر کھیلوں میں دونوں ممالک کے کھلاڑی کھیلوں کی روایات کے مطابق ہاتھ ملاتے رہے۔

یہ بھی قابل ذکر ہے کہ بھارتی وزیر خارجہ جے شنکر گزشتہ برس پاکستان میں منعقد ہونے والے شنگھائی تعاون تنظیم (SCO) کے اجلاس میں شرکت کر چکے ہیں، جہاں ان کی ملاقات پاکستان کے وزیر خارجہ اسحاق ڈار سے بھی ہوئی تھی۔