بھارتی بارڈر سکیورٹی فورسز کی فائرنگ سے 2 نہتے پاکستانی شہری جاں بحق

پاک بھارت بین الاقوامی سرحد کے قریب بھارتی بارڈر سیکیورٹی فورسز (BSF) نے نہتے پاکستانی شہریوں پر بلااشتعال فائرنگ کر دی، جس کے نتیجے میں 2 شہری جاں بحق اور ایک شدید زخمی ہو گیا۔ سیکیورٹی ذرائع کے مطابق، لدھڑ گاؤں اور جٹاں والی حویلی کے رہائشی تینوں مقامی شہری سرحد پر واقع بارڈر پلر سے محض چند قدم آگے بڑھے تھے کہ بی ایس ایف کے اہلکاروں نے بغیر کسی انتباہ یا وارننگ کے ان پر اندھا دھند فائرنگ کر دی۔ جاں بحق ہونے والے شہریوں کی شناخت عظمت رسول ولد عطاء اللہ اور محسن جٹ کے نام سے ہوئی ہے۔

سیکیورٹی ذرائع نے اس بات کی شدید تردید کی ہے کہ شہریوں نے سرحد کی باڑ (Border Fence) عبور کرنے کی کوشش کی تھی۔ انہوں نے بتایا کہ تینوں شہری بالکل نہتے تھے، جبکہ بھارتی میڈیا نے روایتی ہتھکنڈے اپنااتے ہوئے ان معصوم دیہاتیوں کو زبردستی درانداز ثابت کرنے کی کوشش کی ہے۔ ذرائع کے مطابق، بھارتی فورسز کا یہ رویہ بارڈر پروجیکٹ، سرحدی معاہدوں اور قائم شدہ معمول کے قوائد و ضوابط (SOPs) کی کھلی خلاف ورزی ہے، جس پر شدید تشویش اور احتجاج ریکارڈ کرایا جا رہا ہے۔