بھارت کو غرور تھا کہ اس کے دنیا سے تعلقات اچھے ہیں: مراد علی شاہ

وزیراعلیٰ سندھ سید مراد علی شاہ نے کہا ہے کہ بھارت کو یہ غرور تھا کہ اس کے دنیا بھر سے تعلقات مضبوط ہیں، تاہم پاکستان نے نہ صرف جنگی میدان میں بلکہ سفارتی سطح پر بھی بھارت کو شکست دی اور عالمی سطح پر اس کے پروپیگنڈے کو ناکام بنایا۔

کراچی میں مزارِ قائد پر حاضری کے بعد گورنر سندھ اور کابینہ ارکان کے ہمراہ میڈیا سے گفتگو کرتے ہوئے وزیراعلیٰ سندھ نے کہا کہ عالمِ اسلام کو متحد ہو کر دشمن قوتوں کا مقابلہ کرنا ہوگا اور ملک کی بہتری کے لیے قومی اتحاد ناگزیر ہے۔ انہوں نے کہا کہ پاکستان 2025 کی کامیابیوں کے بعد 2026 کی مزید کامیابیوں کی جانب بڑھ رہا ہے۔

مراد علی شاہ کا کہنا تھا کہ قومی ایئر لائن کی نجکاری ایک مثبت قدم ہے تاہم ایئر لائن کے ملازمین کے حقوق اور تحفظ کو یقینی بنایا جانا چاہیے۔ انہوں نے بتایا کہ کراچی کی این ای ڈی یونیورسٹی میں ٹیکنالوجی پارک قائم کیا جا رہا ہے جبکہ ٹریٹمنٹ پلانٹ فور کے منصوبے پر بھی کام شروع ہو چکا ہے۔

اس سے قبل وزیراعلیٰ سندھ نے بانیٔ پاکستان قائداعظم محمد علی جناح کے مزار پر حاضری دی، پھولوں کی چادر چڑھائی، فاتحہ خوانی کی اور مہمانوں کی کتاب میں اپنے تاثرات قلم بند کیے۔