بھارت میں شدید ہیٹ ویو، درجہ حرارت 45 ڈگری سے تجاوز، 16 افراد جان کی بازی ہار گئے

بھارت کے جنوبی علاقوں میں شدید ہیٹ ویو اور غیر معمولی گرمی کے باعث کم از کم 16 افراد جان کی بازی ہار گئے ہیں جبکہ مختلف شہروں میں درجہ حرارت 45 ڈگری سینٹی گریڈ سے بھی تجاوز کر گیا ہے۔

غیر ملکی خبر رساں ادارے کے مطابق ریاست تلنگانہ میں ہیٹ اسٹروک سے اموات رپورٹ ہوئی ہیں جس کے بعد مقامی حکومت نے ہنگامی اقدامات اور عوام کے لیے احتیاطی تدابیر جاری کر دی ہیں۔

ریاستی وزیر ریونیو سری نیواسا ریڈی نے کہا ہے کہ گرمی کی شدت غیر معمولی سطح تک پہنچ چکی ہے، اس لیے پورے صوبے میں الرٹ جاری کرتے ہوئے شہریوں کو ہیٹ ویو سے بچاؤ کے لیے پیشگی آگاہی دی جا رہی ہے۔

طبی ماہرین کے مطابق شدید گرمی جسم میں پانی کی کمی کا باعث بنتی ہے جس سے خون گاڑھا ہو سکتا ہے اور سنگین صورت میں جسمانی اعضا کام کرنا بند کر سکتے ہیں۔ حکام نے بزرگوں، بچوں اور حاملہ خواتین کو دن کے اوقات میں غیر ضروری طور پر باہر نہ نکلنے کی ہدایت کی ہے۔

بھارتی محکمہ موسمیات پہلے ہی خبردار کر چکا تھا کہ ملک کے مختلف حصوں میں درجہ حرارت معمول سے زیادہ رہے گا اور شدید ہیٹ ویو کا خطرہ موجود ہے۔

دارالحکومت نئی دہلی سمیت کئی شہروں میں اس ہفتے درجہ حرارت مسلسل 40 ڈگری سے اوپر ریکارڈ کیا گیا، جس کے باعث بجلی کی طلب میں بھی غیر معمولی اضافہ دیکھنے میں آیا۔