مودی سرکار کا آبنائے ہرمز سے گزرنے والے بحری جہازوں پر بھارتی عملہ تعینات نہ کرنے کا مطالبہ

عالمی میڈیا کی رپورٹ کے مطابق بھارت کی مودی سرکار نے سکیورٹی خدشات کے پیشِ نظر ایک بڑا فیصلہ کرتے ہوئے آبنائے ہرمز سے گزرنے والے بحری جہازوں پر بھارتی عملہ تعینات نہ کرنے کا مطالبہ کر دیا ہے۔ بھارت میں جہاز رانی کے ڈائریکٹوریٹ جنرل (DGS) نے تمام بحری جہازوں کے مالکان، آپریٹرز، منیجرز اور عملہ بھرتی کرنے والی ایجنسیوں و کمپنیوں کو باضابطہ ہدایت جاری کی ہے کہ وہ اگلے احکامات تک آبنائے ہرمز اور اس کے قریبی سمندری راستوں سے گزرنے والے جہازوں پر بھارتی شہریوں کی تعیناتی سے مکمل گریز کریں۔

رپورٹ کے مطابق، مودی حکومت کی جانب سے یہ ہنگامی حکم نامہ رواں ہفتے آبنائے ہرمز کے آس پاس دو بحری جہازوں پر ہونے والے حملوں کے بعد جاری کیا گیا ہے، جن میں افسوسناک طور پر دو بھارتی شہری ہلاک ہو گئے تھے۔ جاری کردہ حکومتی حکم نامے میں کہا گیا ہے کہ خلیج فارس کے علاقے میں بڑھتی ہوئی عسکری کشیدگی کے باعث ڈائریکٹوریٹ ضروری سمجھتا ہے کہ اس خطے میں کام کرنے والے تجارتی جہازوں پر خدمات انجام دینے والے بھارتی شہریوں کے تحفظ اور ان کے مفادات کے لیے غیر معمولی احتیاطی تدابیر اختیار کی جائیں۔

واضح رہے کہ خلیج فارس اور آبنائے ہرمز کا علاقہ طویل عرصے سے شدید تناؤ کا شکار ہے۔ اقوامِ متحدہ کے مطابق، رواں سال 28 فروری سے ایران کے خلاف امریکا اور اسرائیل کی شروع ہونے والی جنگ کے بعد سے اب تک آبنائے ہرمز اور اس کے قریبی پانیوں میں ہونے والے مختلف حملوں میں بحری جہازوں کے عملے کے کم از کم 14 ارکان اپنی جانیں گنوا چکے ہیں۔ ان ہلاکتوں میں وہ 3 افراد بھی شامل ہیں جو گزشتہ ماہ 9 جون کو عمان کے ساحل پر ’سیٹبیلو‘ نامی آئل ٹینکر پر ہونے والے امریکی حملے کے نتیجے میں مارے گئے تھے۔