مدینہ منورہ اور ملحقہ علاقوں میں گرج چمک کے ساتھ بارش سردی میں اضافہ

مدینہ منورہ اور اس سے ملحقہ علاقوں میں گرج چمک کے ساتھ اچانک موسلادھار بارش کا سلسلہ شروع ہوگیا جس سے موسم خوشگوار ہونے کے ساتھ ساتھ سردی میں اضافہ ہوگیا۔ شہر بھر میں کالی گھٹاؤں نے ڈیرے ڈالے رکھے اور وقفے وقفے سے برسنے والی بارش نے ماحول کو تازگی بخش دی۔
مسجد نبویؐ میں بھی بارانِ رحمت خوب جم کر برسی جبکہ گنبد خضری پر برسنے والی بارش نے نہایت دلکش اور روح پرور مناظر پیش کیے۔ زائرین نے بارش کے موقع پر اللہ تعالیٰ کا شکر ادا کیا اور مسجد نبویؐ کے صحن میں موجود لوگوں نے یہ مناظر اپنے موبائل فونز میں بھی محفوظ کیے۔
حکام کے مطابق بارش کے بعد سردی کی شدت میں اضافہ ہوگیا ہے، لہٰذا مدینہ منورہ آنے والے زائرین کو ہدایت کی گئی ہے کہ وہ گرم کپڑے ہمراہ رکھیں تاکہ سرد موسم کے دوران کسی قسم کی دشواری سے بچا جا سکے۔