افریقی ملک بینن میں فوجی بغاوت کی کوشش ناکام، حکومت نے دوبارہ کنٹرول حاصل کرلیا

صدارتی دفتر سے جاری ہونے والے بیان کے مطابق بینن کے صدر پیٹریس ٹیلون محفوظ ہیں اور ملک کی اصل فوج دوبارہ کنٹرول حاصل کر رہی ہے۔

بیان میں باغیوں کے حوالے سے کہا گیا کہ یہ لوگوں کا ایک چھوٹا سا گروپ ہے جو صرف ٹیلیویژن کنٹرول کرسکتا ہے، بغاوت کی کوشش ہورہی ہے لیکن صورتحال قابو میں ہے۔اس سے قبل ایک فوجی گروہ نے سرکاری ٹی وی پر آکر اعلان کیا کہ ملک کا اقتدار فوج نے سنبھال لیا ہے، سرحدوں کو بند کردیا گیا ہے اور سیاسی جماعتوں کوبھی معطل کردیا گیا ہے۔فوجی گروہ کے بیان میں یہ بھی کہا گیا کہ فوج بینن کے لوگوں کو ایک نئے دور کی امید دلانے کا عہدکرتی ہے، آئین اورسیاسی جماعتوں کی سرگرمیاں معطل ہیں اور تمام ادارے تحلیل کردیے گئے ہیں۔غیر ملکی خبررساں ایجنسی کے مطابق بینن کے صدر پیٹریس ٹیلون 2016 سے ملک کا اقتدار سنبھالے ہوئے ہیں بینن میں صدر کی مدت ختم ہونے پر اگلے سال اپریل میں صدارتی انتخابات ہونے ہیں۔