پنجاب میں ’’سہولت آن دی گو بازار‘‘ عوام کی توجہ کا مرکز بن گیا

پنجاب میں ملک کا پہلا اور منفرد ’’سہولت آن دی گو بازار‘‘ عوامی توجہ کا مرکز بن گیا ہے، جہاں ریڑھی بانوں کو باعزت روزگار اور شہریوں کو معیاری و سستی اشیاء ایک ہی جگہ میسر آ رہی ہیں۔ وزیراعلیٰ پنجاب مریم نواز شریف کی ہدایت پر 400 سے زائد ریڑھی بانوں کو اوپن قرعہ اندازی کے ذریعے سٹالز الاٹ کیے گئے ہیں۔

لاہور میں پہلے مرحلے کے تحت گلشن راوی، شادمان، مادرِ ملت، مدینہ مارکیٹ، ٹاؤن شپ، سندر روڈ اور کوٹھا پنڈ فیصل ٹاؤن میں سہولت آن دی گو بازار فعال ہو چکے ہیں، جبکہ کھاڑک نالہ، اعوان ٹاؤن، ویلنشیا اور شاہدرہ میں بھی بازار کھول دیے گئے ہیں۔ فروری تک مزید پانچ مقامات پر یہ منصوبہ مکمل کیا جائے گا۔

ان بازاروں میں پھل، سبزیاں، چکن اور کریانہ اشیاء ڈی سی ریٹس پر دستیاب ہیں، جبکہ سکیورٹی، صفائی، واش رومز اور ڈرائیو تھرو خریداری جیسی سہولیات بھی فراہم کی گئی ہیں۔ اس منصوبے کے ذریعے رمضان بازاروں میں ملنے والی سستی اشیاء سال بھر دستیاب رہیں گی۔

ریڑھی بانوں نے وزیراعلیٰ پنجاب کا شکریہ ادا کرتے ہوئے کہا کہ اب وہ ریڑھی والے نہیں بلکہ اپنی دکانوں کے باقاعدہ مالک بن چکے ہیں۔ وزیراعلیٰ مریم نواز شریف نے کہا کہ حقیقی ترقی وہی ہے جس میں غریب محنت کش بھی شریک ہو، اور ’’سہولت آن دی گو بازار‘‘ قائد محمد نواز شریف کے صاف اور خوبصورت لاہور کے وژن کا عکاس ہے۔

چیئرمین پنجاب سہولت بازار اتھارٹی کے مطابق اس منصوبے سے رمضان بازاروں میں دی جانے والی سبسڈی کی ضرورت بھی کم ہوگی، جبکہ اسے مرحلہ وار لاہور سمیت پنجاب کے دیگر علاقوں تک وسعت دی جائے گی۔