پشاور : عمران خان کرکٹ اسٹیڈیم کے انکلوژرز 1992 کی فاتح ٹیم کے کھلاڑیوں کے نام سے منسوب کرنے کا فیصلہ

خیبرپختونخوا حکومت نے پشاور میں واقع عمران خان کرکٹ اسٹیڈیم کے انکلوژرز کو 1992 کے عالمی کپ میں پاکستان کو تاریخی فتح دلانے والی قومی ٹیم کے کھلاڑیوں کے نام سے منسوب کرنے کی منظوری دے دی ہے۔

اس سلسلے میں محکمہ کھیل کی جانب سے ایک سمری صوبائی حکومت کو ارسال کی گئی تھی جسے باضابطہ طور پر منظور کر لیا گیا ہے۔

حکام کے مطابق موجودہ ٹی ٹوئنٹی کپ کے اختتام کے بعد اسٹیڈیم کے مختلف انکلوژرز کو قومی ٹیم کے کھلاڑیوں کے ناموں سے منسوب کرنے کا عمل شروع کیا جائے گا۔

واضح رہے کہ 1992 کے عالمی کپ میں پاکستان ٹیم کی قیادت کپتان عمران خان نے کی تھی اور قومی ٹیم نے پہلی بار عالمی کپ اپنے نام کیا تھا۔

اس فاتح ٹیم میں جاوید میانداد، وسیم اکرم، عاقب جاوید، انضمام الحق، سلیم ملک، اعجاز احمد، عامر سہیل، رمیز راجہ، مشتاق احمد، اقبال سکندر، معین خان، زاہد فضل اور وسیم حیدر شامل تھے۔

ڈائریکٹر جنرل کھیل تاشفین حیدر کے مطابق صوبائی حکومت کی منظوری کے بعد ٹی ٹوئنٹی ٹورنامنٹ کے اختتام پر اس منصوبے پر باقاعدہ کام کا آغاز کر دیا جائے گا۔