عمران خان سے ملاقات تک حکومتی اجلاس میں شرکت نہیں کریں گے، تحریک انصاف کا دوٹوک اعلان

پاکستان تحریک انصاف نے حکومت کی جانب سے بلائے گئے اجلاس میں شرکت کو عمران خان سے ملاقات سے مشروط کر دیا ہے۔ سیاسی کمیٹی کے اجلاس کے بعد جاری اعلامیے میں واضح کیا گیا ہے کہ جب تک بانی تحریک انصاف سے ملاقات کی اجازت نہیں دی جاتی، کسی حکومتی بریفنگ میں شرکت نہیں کی جائے گی۔

تحریک انصاف کے مطابق دعوت اسی وقت قبول کی جائے گی جب ملاقات کا مطالبہ تسلیم کیا جائے۔ اعلامیے میں کہا گیا ہے کہ عدالتی احکامات پر مکمل عمل درآمد یقینی بنایا جائے اور عمران خان کے آئینی و قانونی حقوق فراہم کیے جائیں۔

پارٹی نے مزید مطالبہ کیا ہے کہ عمران خان کو فوری طبی سہولت دی جائے، انہیں شفا انٹرنیشنل اسپتال منتقل کیا جائے اور فیملی و وکلاء سے بلا رکاوٹ ملاقات کرائی جائے۔ اعلامیے میں اس امر پر بھی زور دیا گیا کہ علاج ان کے ذاتی معالجین کی نگرانی میں کرایا جائے۔

یاد رہے کہ وزیر اعظم شہباز شریف نے موجودہ صورتحال پر سیاسی قیادت کو اعتماد میں لینے کا فیصلہ کیا ہے۔ ذرائع کے مطابق وزیر اعظم دونوں ایوانوں کے قائدین حزب اختلاف اور پارلیمانی رہنماؤں کو بریفنگ دیں گے، جس میں مشرق وسطیٰ کی تازہ صورتحال اور ایران پر حملوں کے تناظر میں پاکستان کی خارجہ پالیسی پر تفصیلی آگاہی دی جائے گی۔