عمران خان  کی آنکھوں کا طبی معائنہ، پمز اسپتال نے رپورٹ جاری کردی

اسلام آباد میں بانی چیئرمین تحریک انصاف کی آنکھوں کے طبی معائنے سے متعلق اہم پیش رفت سامنے آئی ہے۔ پاکستان انسٹی ٹیوٹ آف میڈیکل سائنسز کی انتظامیہ نے طبی معائنے سے متعلق اعلامیہ جاری کر دیا۔

اعلامیے کے مطابق ماہرینِ چشم پر مشتمل میڈیکل بورڈ نے 3 مارچ کو اڈیالہ میں بانی تحریک انصاف کا تفصیلی معائنہ کیا۔ بورڈ میں پمز اور الشِفاء آئی ٹرسٹ کے ماہرینِ چشم شامل تھے۔

ترجمان پمز کے مطابق معائنے کے دوران بانی تحریک انصاف کی بینائی میں نمایاں بہتری ریکارڈ کی گئی ہے۔ رپورٹ میں بتایا گیا کہ انہیں آنکھ میں دوسرا اینٹی وی ای جی ایف انجکشن لگایا گیا تھا جس کے مثبت نتائج سامنے آئے ہیں۔

اعلامیے میں کہا گیا ہے کہ اس وقت بانی تحریک انصاف کی بینائی کافی حد تک بہتر ہے۔ میڈیکل بورڈ نے سابق وزیر اعظم کے لیے پہلے سے تجویز کردہ علاج جاری رکھنے کی سفارش بھی کی ہے۔