بانی پی ٹی آئی کے کزن قاسم زمان کی 30 روزہ نظر بندی کے احکامات جاری

راولپنڈی انتظامیہ نے بانیِ پاکستان تحریک انصاف (پی ٹی آئی) عمران خان کے کزن قاسم زمان کی 30 روزہ نظر بندی کے باضابطہ احکامات جاری کر دیے ہیں۔ ڈپٹی کمشنر راولپنڈی کیپٹن (ر) ندیم ناصر کی جانب سے تھری ایم پی او (3 MPO – Maintenance of Public Order) کے تحت یہ حکم نامہ سی پی او راولپنڈی کی سفارش اور درخواست پر جاری کیا گیا۔

پولیس رپورٹ اور تھانہ صدر بیرونی کے ایس ایچ او کے مطابق قاسم زمان شہر میں امن و امان کی صورتِ حال خراب کرنے، غیر قانونی اجتماعات اور ممنوعہ سیاسی سرگرمیوں کی منصوبہ بندی میں ملوث پائے گئے۔ ڈسٹرکٹ انٹیلی جنس کمیٹی نے بھی پولیس کی رپورٹ سے اتفاق کرتے ہوئے ان کی نظر بندی کی توثیق کی۔ پولیس نے راولپنڈی سے حراست میں لیے جانے کے بعد قاسم زمان کو فوری طور پر اڈیالہ جیل حکام کے حوالے کر دیا ہے، جبکہ انتظامیہ کی جانب سے انہیں اٹک جیل منتقل کیے جانے کا قوی امکان ظاہر کیا جا رہا ہے۔