عالمی مالیاتی فنڈ کا پاکستان کی معیشت میں بہتری، مہنگائی قابو میں رہنے کا اعتراف

عالمی مالیاتی فنڈ (آئی ایم ایف) نے پاکستان کی معاشی اصلاحات اور پالیسیوں کے مثبت نتائج کا اعتراف کرتے ہوئے کہا ہے کہ ملک میں مہنگائی کی شرح قابو میں ہے اور معاشی استحکام کی جانب پیش رفت ہو رہی ہے۔

آئی ایم ایف کی ڈائریکٹر کمیونیکیشن جولی کوزیک نے واشنگٹن میں پریس بریفنگ کے دوران بتایا کہ آئی ایم ایف کا وفد 25 فروری سے پاکستان کا دورہ کرے گا۔ اس دورے کے دوران توسیعی فنڈ سہولت (EFF) کے تحت تیسرے اور ریزیلینس اینڈ سسٹین ایبلٹی فیسلٹی (RSF) کے دوسرے جائزے پر مذاکرات کیے جائیں گے۔

جولی کوزیک نے واضح کیا کہ آئی ایم ایف پروگرام کی بدولت عالمی اداروں کا پاکستان پر اعتماد بحال ہوا ہے۔ انہوں نے بتایا کہ مالی سال 2025 میں پاکستان کی مالی کارکردگی انتہائی مضبوط رہی، جہاں ملک نے جی ڈی پی کا 1.3 فیصد بنیادی مالیاتی سرپلس حاصل کیا ہے۔ مزید برآں، پاکستان نے 14 سال بعد پہلی مرتبہ کرنٹ اکاؤنٹ سرپلس بھی ریکارڈ کیا ہے، جو معاشی بہتری کی بڑی علامت ہے۔

آئی ایم ایف نے اپنی رپورٹ میں ٹیکس نظام کی سادگی، شفافیت اور سرکاری خریداری کے عمل میں بہتری پر زور دیتے ہوئے کرپشن کے خاتمے کے لیے اصلاحات کی تجاویز بھی پیش کی ہیں۔