ڈپٹی چیئرمین اور پراسیکیوٹر جنرل نیب کی تعیناتیاں چیلنج، اسلام آباد ہائیکورٹ کا نیب اور وزارتِ قانون کو نوٹس

اسلام آباد ہائیکورٹ نے نیب کے ڈپٹی چیئرمین احتشام قادر اور پراسیکیوٹر جنرل سہیل ناصر کی تعیناتیوں کو غیر قانونی قرار دینے سے متعلق دائر درخواست پر نیب اور وزارتِ قانون سمیت تمام متعلقہ فریقین کو باقاعدہ نوٹس جاری کرتے ہوئے جواب طلب کر لیا ہے۔ جسٹس عمیر مجید ملک نے ڈاکٹر جی ایم چوہدری ایڈووکیٹ کی آئینی درخواست پر سماعت کی، جس میں موقف اختیار کیا گیا کہ یہ تقرریاں بغیر اشتہار اور نیب آرڈیننس کی سیکشن 5، 6، 7 اور 8 کی خلاف ورزی کرتے ہوئے کی گئی ہیں۔ عدالت عالیہ نے فریقین کو کام سے روکنے اور تقرریوں کا ریکارڈ طلب کرنے کی متفرق درخواستوں پر بھی نوٹسز جاری کرتے ہوئے کیس کی سماعت ملتوی کر دی ہے۔