حیدر آباد میں خواتین پولیس پر مشتمل خصوصی ’’نِسا اسکواڈ‘‘ تشکیل

سندھ کے اہم شہر حیدرآباد میں خواتین کی سیکیورٹی کو یقینی بنانے اور عوامی مقامات پر مؤثر نگرانی کے لیے پولیس کی جانب سے ‘نِسا اسکواڈ’ (Nisa Squad) نامی ایک خصوصی لیڈیز پولیس فورس تشکیل دے دی گئی ہے۔ ایس ایس پی حیدرآباد شاہزیب چاچڑ کے مطابق اس نِسا اسکواڈ میں 50 تجربہ کار خواتین پولیس اہلکار شامل کی گئی ہیں، جو موٹرسائیکلوں پر سوار ہو کر شہر کے مختلف حصوں میں باقاعدہ گشت کریں گی۔

اسکواڈ کے قیام کے فوراً بعد خواتین پولیس اہلکاروں نے شہر کی اہم ترین شاہراہ آٹو بھان روڈ سمیت مختلف تجارتی علاقوں میں موٹرسائیکلوں پر گشت اور چیکنگ کا باقاعدہ آغاز کر دیا ہے۔ ایس ایس پی شاہزیب چاچڑ نے مزید بتایا کہ اس خصوصی فورس کو مارکیٹوں، شاپنگ مالز، فیملی پارکس اور دیگر پبلک مقامات پر حراساں کرنے جیسے واقعات کی روک تھام اور سیکیورٹی اقدامات کو مزید فعال بنانے کے لیے تعینات کیا گیا ہے تاکہ خواتین اور ان کے اہل خانہ بلا خوف و خطر آمدورفت جاری رکھ سکیں۔