حیدر آباد میں غیر قانونی مقیم افغانیوں کیخلاف کریک ڈاؤن تیز، 14 گرفتار

حکومتِ پاکستان کی ہدایات پر غیر قانونی طور پر مقیم افغان شہریوں کے خلاف ملک گیر کریک ڈاؤن کا سلسلہ تیز کر دیا گیا ہے۔ اس سلسلے میں حیدرآباد پولیس نے شہر کے مختلف علاقوں میں بڑی کارروائیاں کرتے ہوئے 14 مشتبہ افراد کو حراست میں لے لیا ہے۔

پولیس ترجمان کی جانب سے جاری کردہ بیان کے مطابق، حراست میں لیے گئے تمام مشتبہ افراد کو فوری طور پر ہولڈنگ سینٹر منتقل کر دیا گیا ہے، جہاں ان کی دستاویزات اور شناخت کی سخت جانچ پڑتال (ویریفکیشن) کا عمل جاری ہے۔ جب تک تمام زیرِ حراست افراد کی دستاویزات کی تصدیق کا عمل مکمل نہیں ہو جاتا، وہ ہولڈنگ سینٹر میں ہی رہیں گے۔ جن افراد کے پاس قانونی دستاویزات موجود نہیں ہوں گی، ان کے خلاف سخت قانونی تقاضے پورے کرتے ہوئے کارروائی عمل میں لائی جائے گی۔

ترجمان نے مزید واضح کیا کہ یہ تمام کارروائیاں حکومتی احکامات کے عین مطابق کی جا رہی ہیں۔ شہر بھر میں غیر قانونی طور پر مقیم غیر ملکیوں کی نشاندہی اور ان کی تصدیق کا عمل مزید تیز کر دیا گیا ہے اور ویریفکیشن کا عمل مکمل ہوتے ہی مروجہ قوانین کے تحت مزید کارروائی کی جائے گی۔