برطانیہ اور فرانس یورپ کو جنگ میں دھکیلنا چاہتے ہیں :ہنگری

ہنگری کے وزیر خارجہ پیٹر سیجارتو نے کہا ہے کہ برطانیہ اور فرانس یوکرین میں اپنی فوجیں بھیجنے کے منصوبے سے پورے یورپ کو روس کے ساتھ جنگ میں گھسیٹنے کا خطرہ مول لے سکتے ہیں۔

ایک تقریب سے خطاب کرتے ہوئے سیجارتو نے کہا کہ یورپی رہنماؤں کا جنگی جنون ہنگری کے لیے سب سے بڑا خطرہ ہے۔ انہوں نے مزید کہا کہ یورپی یونین کے رہنما ہنگری کے وزیر اعظم وکٹر اوربان کو اپنے منصوبوں کی راہ میں رکاوٹ کے طور پر دیکھ رہے ہیں اور آئندہ انتخابات میں ان کی جگہ یوکرین کے حامی رہنما کی کامیابی چاہتے ہیں۔

پیٹر سیجارتو نے واضح کیا کہ اگر ہنگری انتخابات جیت گیا تو ملک جنگ سے باہر رہے گا، لیکن اگر شکست ہوئی تو یورپ کا نیا منصوبہ نافذ ہو جائے گا۔

واضح رہے کہ ہنگری نے روس کے ساتھ مزید کشیدگی کی مخالفت کی ہے اور یورپی یونین اور برطانیہ پر زور دیا ہے کہ وہ سفارت کاری پر توجہ دیں۔ برطانیہ کے وزیراعظم سر کیئر اسٹارمر اور فرانسیسی صدر ایمانوئل میکرون نے حال ہی میں اعلان کیا تھا کہ اگر روس اور یوکرین کے درمیان امن معاہدہ طے پا گیا تو دونوں ممالک یوکرین میں اپنی فوج تعینات کریں گے۔

بعد ازاں برطانیہ کے وزیر دفاع جان ہیلی نے کیف کے دورے کے دوران کہا کہ لندن ایک ملٹی نیشنل فورس پر 270 ملین ڈالر خرچ کرے گا۔