امریکا اور ایران کے شہری تنصیبات پر حملے جنگی قوانین کی خلاف ورزی ہیں: ہیومن رائٹس واچ

بین الاقوامی انسانی حقوق کی تنظیم ‘ہیومن رائٹس واچ’ (Human Rights Watch) نے امریکہ اور ایران کی قیادت کو خبردار کیا ہے کہ شہری تنصیبات کو جان بوجھ کر نشانہ بنانا بین الاقوامی جنگی قوانین کی سنگین خلاف ورزی ہے اور یہ اقدام جنگی جرائم کے زمرے میں آتا ہے۔

ہیومن رائٹس واچ کے مشرقِ وسطیٰ اور شمالی افریقہ کی ڈائریکٹر بلقیس جراح نے اپنے ایک اہم بیان میں کہا ہے کہ امریکی اور ایرانی اعلیٰ حکام ایک دوسرے کے خلاف شہری انفراسٹرکچر پر دانستہ حملوں کی کھلی دھمکیاں دے رہے ہیں۔ انہوں نے تشویش کا اظہار کرتے ہوئے بتایا کہ یہ دھمکیاں دونوں ممالک کے درمیان حالیہ فوجی تصادم اور لڑائی کے بعد سامنے آئی ہیں، جس میں ایران، خلیجی ممالک اور اسرائیل کے اندر شہریوں اور ان کی غیر فوجی املاک کو غیر قانونی طور پر نشانہ بنایا گیا۔

بلقیس جراح نے عالمی برادری پر زور دیتے ہوئے کہا کہ دنیا کے تمام ممالک کو امریکہ اور ایران پر یہ بات بالکل واضح کرنی چاہیے کہ جنگی جرائم میں ملوث یا ان کے ذمہ دار تمام افراد کو انصاف کے کٹہرے میں لایا جائے گا، جس میں عالمی دائرہ اختیار (Universal Jurisdiction) کے تحت قانونی کارروائی اور مقدمات کا سامنا کرنا بھی شامل ہے۔